趙頌茹之前向周刊透露，指第三者劉依靜(Ruby)出陰招搶老公，唔單止經常借機登門入周家融入家中，更不時游說趙頌茹離婚，趙頌茹向記者表示:「我同佢講我成日同老公嗌交，佢就話你自己同佢(周永恒)講離婚，唔係會好冇面。」

已身在新加坡避風頭嘅Ruby，除咗發聲明澄清還網上流傳嘅淫照與其無關之外，亦就趙頌茹指佢工於心計扮好姊妹唆使離婚一事回應。Ruby表示係周永恒兩公婆成日同佢講心事:「佢哋打交都講我聽，近幾次都係阿Yu(趙頌茹)話想分開，我都叫佢唔好。」

對於被指有計劃地「融入家中」，Ruby又高呼冤枉:「我係成日出席佢家庭活動，但唔係不請自來。」談到發生家暴(即上月24日)，Ruby亦有登門，佢就解釋謂:「係因為阿Roy(周永恒)打俾我話我知同老婆嘈，仲話『如果頭家冇咗，寧願死』，咁我驚佢做傻事，咪上佢屋企睇下，見佢冇事，我唔夠半個鐘就走喇。」

講到尾，Ruby堅稱自己絕非第三者：「如果佢(趙頌茹)要話我係衰嘅，我講乜嘢都係錯。佢哋夫婦嗌交好正常，床頭打交床兕尾和。」