港股本應調整，但一直冇藉口，噚日日股插水，港股終於有得落，收市18954，跌228點，跌穿10日線（18972）；期指跌勢仲急，低水擴大到89點。
大市大升後調整，好正常，回幾多？三幾百點係意料中事，就算落到18500水平，牛市升勢依然冇被破壞。家吓貨源大部份落在基金同大戶手中，散戶睇住個市一路升，一路減磅，賺得鬼咁開心，但就愈來愈輕身。大戶操得個市上去，調整幾多，當然亦係由佢哋話事，散戶可以等機會，個勢一跌定，就上車。
內地地產股好強勢，逆市而升嘅包括北辰（588）、富力（2777）、中新（563）、世茂（813）同越秀投資（123）等，越投曾搶上1.72元，收1.69元，升3仙，家吓造緊旗形，一衝破近日1.73元高位阻力，短線目標1.90元。
基金揸重越投，在1.40元至1.60元間買咗幾個月，佢哋中線嘅目標價係2.50元至3元。呢輪越投走勢已明顯轉強，看來基金會好快發動攻勢。
越投係內地大型房地產發展公司，主要在廣州擁有好多低成本嘅靚地，上禮拜又斥資20億元，在廣州收購兩個項目，一個係17億元（人民幣．下同）買入荔灣區商住項目，可建築面積48.2萬平方米，每平方米樓面地價3527元；另一個係以3.67億元購入天河區珠江新城商業項目，樓面面積10.6萬平方米，每平方米樓面地價3462元。呢兩個數，係最新嘅指標，證明越投嘅土儲好值錢。

走勢已明顯轉強

越投現有土儲約580萬平方米，每平方米成本唔使2000元，現時廣州嘅地價平均已升到3500至4000元，計番升值條數，全部土儲實值可增加116億元，即每股越投增值1.75元。越投今年中期結算日NAV1.55元，加埋實值之數，實際NAV係3.30元，基金睇2.50至3元嘅目標價，其實仍算係保守。
郭兆誠