《2018年亞洲小姐競選》十位候選佳麗今日清一色就換上K-Pop Look，騷腰露腿現身國藝影城，齊齊喺老香港街拍造型照。其中噚日喺泳裝環節揚言要喺比賽日塞兩個「砵仔糕」突圍嘅1號賴嘉瑩就話報道出街後，佳麗們都話到時要塞夠三個「砵仔糕」還擊，問到今日仲有冇用「砵仔糕」？佢話：「今日個造型唔使，主要騷腳。」講到自己係第一次嚟影城，佢話：「呢度好得意，不過好似唔係好襯K-Pop，隔離公園拍可能適合啲。」

問到鍾唔鍾意聽K-Pop？話賴嘉瑩：「都有睇過啲女團演出。」講到喺決賽贏出頭三甲有機會去韓國受訓，佢話自己都好期待，希望有機會去到。而3號張靜茵就話媽咪鄉下喺佛山，所以平時都經常返上嚟，對於今日嘅K-Pop造型佢話好滿意：「自己平日都有留意男團女團，不過我鍾意睇女團比較多。」竟然唔係睇男仔？佢話：「我都係鍾意啲正常身型嘅男仔多啲，唔好太瘦削。」

精選娛聞，喺晒《娛果》
http://fb.com/appledailyent