前女子組合2R的黃婉君(Rosanne)、混血名模Amanda S.及Ana R.前晚現身沙田大會堂,出席王仁曼芭蕾舞學校表演晚會。Rosanne兩個月前誕下第二名兒子,已回復線條,問到兩子夠晒數,可以收工?她笑言:「仲想追番個女,老公冇所謂,因為佢係好爸爸,好鍾意同小朋友玩。」
Rosanne透露兩個妹妹有幫手湊B:「兩個妹當咗係自己個仔,𠵱家見到我湊B,都笑話單身要玩多啲。」提到妹妹黃婉佩(Race)尚未有拖拍,Rosanne表示:「都有幫佢睇,最筍嗰個都俾我揀咗,有留意老公身邊朋友有冇啱,佢兩個阿哥都有伴侶。」
採訪、攝影:溫敏芝