「2014/2015公益金港島、九龍區百萬行」今日喺香港大球場舉行，無綫高層李寶安、鄭善強、區偉林、樂易玲、佘詩曼、黎耀祥、莊思敏等，亞視則有葉家寶、袁潔儀、蔡國威、劉錫賢、魏秋樺等，新城就有薛家燕、葉文輝等出席參與。

高舉「迎難而上！」及「堅持不放棄！」字牌嘅亞視抵達大球場後，曾經喺亞視做嘢嘅安德尊即刻上前同葉家寶、袁潔儀、魏秋樺等等打招呼兼合照，反觀曾經係亞視花旦嘅陳煒就無動於衷。之後行政長官梁振英同太太梁唐青儀在場分別同無綫、亞視、新城逐一握手。喺起步嘅時候，沿途有唔少市民，除咗拎住手機影無綫藝員外，仲力撐亞視：「亞視，加油！」、「支持你哋呀！」葉家寶就走到市民面前握手，又影合照，好似出巡一樣咁受歡迎。

之後去到酒樓用膳，葉家寶帶領劉錫賢、蔡國威等人去到李寶安嗰圍枱打招呼，寒暄咗幾句，又握手同合照，而陳煒喺酒樓嘅時候，就有同亞視嘅員工傾計同埋合照。