梁振英後日就卸任告別禮賓府，八方同事連日觀察，發現梁特一家將搬返其位於山頂貝璐道裕熙園、曾被踢爆僭建嘅獨立屋，因為本月中已有唔少裝修工人出入大宅，大宅前後均搭棚做外牆維修同簷篷清潔，每日至少10名工人開工修葺，包括翻新外牆、重拉電線，梁太唐青儀更親自督導翻新泳池工程，似乎正為搬回舊居作最後準備。

5年來冇得游夜水

好似啱啱過咗嘅星期日，特首夫人搭政府專車返抵大宅，同多名工程公司人員商討泳池嘅翻新工程，梁太仲手執一份意大利磁磚品牌嘅設計圖，參考外國戶外泳池設計樣本，就連排氣口嘅設計都似乎有傾過，親自督導一粒鐘先離開。
其實梁特曾經公開話，未做特首前每晚有游水習慣，搬入禮賓府後就放棄咗游夜水；今次梁太親自主理大宅嘅泳池翻新工程，將老舊嘅牆身同磁磚鏟走，全部換新，唔知係咪要送上驚喜，等另一半重拾游泳嗜好？梁太仲不時帶工程人員走入花園草叢，就連戶外蚊機及去水設備都仔細考量，認真關顧至愛調理農務嘅老公。

除咗維修同翻新工程，記者發現近日禮賓府陸續將部份較小型物品及家具率先搬到大宅，至前日更有大貨車駛進禮賓府，將逾20箱物品搬往前行政長官辦公室存放，當中大部份係藏書，分成10幾個透明膠箱盛載（圖），包括新加坡已故總理李光耀撰寫嘅回憶錄《The Singapore Story： Memoirs of Lee Kuan Yew》、張家敏著作《建國以來1949-1997》、王禹著嘅《蕭蔚雲論港澳政治體制》同《般若波羅蜜金剛經》等。
至於禮賓府新主人林鄭月娥幾時遷入，候任辦話根據建築署同機電署嘅專業評估，禮賓府喺現任特首遷出後要進行翻新工程，林鄭計劃8月下旬遷入。

李八方

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk