民主黨已經喺前晚通過接納卿姐以及另外51位前綫黨員嘅過檔申請，除咗卿姐之外，尚有16位女黨員嚟緊，令一向陽盛陰衰嘅民主黨，突然多咗好多女人味。為咗隆重其事，民主黨八位立法會議員噚日雲集立法會，齊齊手拉手同新黨員卿姐影張全家福，民主黨一眾猛男仲不斷拍手大叫「歡迎、歡迎」，𠱁得卿姐鬼咁開心。
其實前綫仲未撤銷卿姐個黨籍，所以家陣佢係雙重黨籍，要向民主黨申請豁免。卿姐坦言，仲未習慣俾人叫做民主黨黨員，相信好難一時間成功變身。據聞前綫鐵定下個月5號擺幾圍，當係敍舊又好、farewell即將離巢嘅人都好，總之要大家盡興而歸，留個快樂回憶。