美股觀望情緒濃厚，港股亦惟有繼續等，雖然人人都估美國聯儲局開會後都唔會加息，但係投資者咁多年都習慣咗喺會議前觀望，這個習慣好似變成「與生俱來」咁，冇得變。港股昨日就咁樣又浪費咗1日青春，恒指跌咗40點，但大局無變，唔炒國企，又唔炒窩輪嘅股民，惟有你眼望我眼，或者數手指。
個市好彩有啲熱門股嘅窩輪炒得幾有鑊氣，國壽（2628）就係當中嘅表表者，先至唔使咁悶，H股指數升番上7000點樓上，睇嚟今日炒賣嘅氣氛會仲好。
中石化C輪9129：中石化（386）自從6月下試250日線見底後，一級高過一級咁炒上嚟，但係9月份嘅炒法有啲唔同咗，成交比之前幾個月大咗好多，雖然月初至月中現雙頂下破，但9RSI其實已上破咗降軌，MACD「雙牛」昨日嘅走勢咁靚，啲買盤擺明今日要上試5.10元，破咗位就推去5.50元嗰頭。

隻中石化C輪9129昨日收26仙，升16%，槓桿率18.9倍（有效9.7倍），槓桿效應算係有效發揮，仲有87日先到期，對沖值0.51，正股現時炒上，9129好有值博率，正股升上5.10元，9129可升上35仙樓上，正股上試5.50元，9129應該唔會低過60仙，正股跌穿4.80元止蝕。
早排介紹過嘅4997都可以諗，昨收57仙，槓桿率8.6倍（有效6.7倍），正股升上5.10元及5.50元，隻輪嘅目標價分別係70仙同1元。
俊樺