當年今日
關於我們

【名家搶先睇】大時代下的滄海遺珠(唐牛)

蘋果日報 2015/04/23 06:00

唐牛

港交所(388)揸fit人李小加接受傳媒訪問時透露,交易系統密謀升呢,準備應付5,000億成交。嘩!成交咪仲有一倍以上增長空間?真正的大時代,似乎仲未來臨。

小加唱好成交,帶挈港交所再創新高,連帶一眾本地券商股亦大炒。中港兩地互聯互通,主要為上市公司服務嘅財經公關,其實亦豬籠入水,事關服務範圍由原來市值30萬億嘅港股市場,擴闊至60萬億嘅A股市場,本港唯一嘅財經公關公司皓天財經(1260),準備一飛沖天!

顯然皓天亦睇到呢塊肥肉,近日進行連串動作︰公司先將投資用嘅優先票據沽出,套回1.6億銀,然後又宣佈上市以來首次批股活動,集資4.2億銀,三扒兩撥拎咗6億銀返嚟,究竟所謂何事?原來用嚟建立O2O金融服務移動網絡專業服務平台——皓天雲,成功與互聯網+呢個熱爆題材拉上關係,果然係公關高手!

皓天概念十足,底子亦豐厚。現價市盈率14倍,市賬率3.6倍,內地同業藍色光標,市盈率43倍,市賬率6.9倍,皓天兩個指標,分別大折讓七成及五成。再講,皓天市值廿億左右,只係藍色光標嘅5%,深港通即將開波,皓天夠晒資格升呢,屆時北水肯定搶到甩轆!受批股消息影響,皓天埋單插水12%,但依然穩守批股價。結論係乜?新一輪升浪最後上車機會囉!

【只要用心,人人都可以係股神!】
https://www.facebook.com/tongcow88