由大陸投資六千萬、「廿八座大王」宋本中執導嘅網劇《反黑》，由22號開播以嚟反應不俗，而且睇得出導演同監製好捨得落本錢喺場景同道具之上，例如盡可能用現場實景，道具上好似車都用實物嚟破壞等，呢一點喺香港劇集上可以話係相當難得。

《反黑》一共三十集，以每日一集嘅形式喺Youtube上免費播出，今晚嚟到第八集，劇情開始進入戲肉，故事講述警察同黑社會交雜嘅故事，戲情相比起時下嘅電視劇，劇集明顯地有較多伏線，令觀眾可以用下腦，而且因為故事背景設定喺主權移交之前，所以其實都有唔少政治暗喻，例如喺第一集，一班黑社會要選坐館，黃樹棠飾演嘅白頭佬叫各個候選人要好似選區議會咁講述自己嘅政綱，再由社團中一人一票投票選出邊個坐館。

至於節奏方面，可能因為係網劇及資金充足嘅關係，劇情之中有較多時間俾演員發揮角色嘅內心戲，對劇情及角色架構上有更強嘅說服力，從而減少因為劇情進展而強逼角色做事嘅突兀感，亦令觀眾感受到角色因為各種因素令到佢哋成長。

不過最難得嘅係，雖然呢套網劇係由大陸投資，但係到目前為止都未有出現為咗照顧大陸觀眾而強行修改令到香港觀眾覺得格格不入嘅情況，更遑論有置入式廣告等「符合國情」令觀眾出戲嘅情況，以現今香港劇集嚟講，呢一類願意投資人力物力心力嘅劇集實屬難得，不過到底會唔會因為呢一套網劇，掀起網劇熱潮就真係要拭目以待喇。