楊洛婷喺本月14日為老公、樂隊Dear Jane主音黃天翱（Tim）誕下囡囡Tanya（新聞連結： http://bit.ly/2wi8dsg ），眨吓眼，佢哋返咗屋企已經一個星期。

楊洛婷當然錫到囡囡燶，今日更特登搵咗個專業攝影師返屋企幫囡囡影咗輯BB沙龍，仲喺自己個Instagram度貼咗張黑白照嚟吊癮，楊洛婷透露：「係我搵人去我屋企影，因為坐緊月，同埋呢啲相一定要喺BB 5至15日大之間影，BB先至瞓得冧，又可以俾你擺pose。我哋影咗幾個造型，包括雞仔、萬聖節、聖誕，同埋一家三口連狗仔。」楊洛婷仲話因為自己太心急，所以先忍唔住放相上Ig，佢話遲啲會有更靚嘅相俾大家睇。

雖然家陣就得2張相睇住先，但既然楊洛婷預告有萬聖節造型的話，應該好快就有得睇！睇Tanya咁得意，一定收到好多糖啦！