娘娘、嬌娃隔空開火，毒舌程度絕對唔講得笑！啱啱完成15個月禁藥停賽令嘅俄羅斯網球手舒拉寶娃，周四喺復出首個WTA比賽斯圖加特網賽再下一城，僅花1小時20分鐘就以直落兩盤7:5、6:1擊敗同胞瑪卡露娃，晉級8強將會面對愛沙尼亞新星干達維特（Anett Kontaveit）。咁啱之前出過聲批評賽會唔應該畀外卡舒娃嘅前一姐姬芭，同日爆冷不敵法國嘅文丹露域出局，唔通舒娃真係有機會捧盃？

除咗勁敵下馬，舒娃喺賽後記招一樣風騷，當被記者問及加拿大美少女寶查早前受訪時指佢係作弊者（cheater）應該終身禁賽，舒娃輕描淡寫講咗句：「我冇任何嘢要講──I am way above that.」即係同從未染指大滿貫兼近6個WTA網賽全部「一輪遊」嘅寶查唔同級數咁話！