今季幾個外籍領隊喺英超聯開閘搶盡風頭,難為一班英格蘭名牌教頭,好似基瑾、卜比笠臣、麥卡倫等,開季兩場重未贏到波;除咗冇晒「飛士」之外,分分鐘提早食到「豉椒炒魷」㖭。
曼城嘅基瑾就最危危乎,前晚又睇住球隊作客伯明翰輸○比一食白果,三戰未開勝門。無怪乎攝影師多次影住基瑾個愁樣,通常呢啲情況都係有預示被炒嘅信息,曼城班高層若果有睇到電視直播,更催化佢哋換人嘅信念!
話晒基瑾及卜比SIR等人對英超聯,甚至英格蘭足球都有好大貢獻,我求大俠真係唔想睇到佢哋唔夠班外省佬玩,好自為之啦。
前領隊走人即留低比亞堤擺明唔妥佢
有市有價嘅修咸頓射手比亞堤終於都係決定留隊;佢遲唔講早唔講,就喺前領隊史杜洛辭職之後至表態,我求大俠就更加相信兩人係有不和。話晒比亞堤喺球會都有份量,搵個不見經傳嘅史杜洛番嚟領軍,邊鎮得住呢位大哥吖!𠵱家史杜洛走人而比亞堤留低,可能係好事㖭。
國米波騷似足球game阿祖安奴又發威
前日國米贏巴素利,今個夏天威到震嘅阿祖安奴又再發威入波,之後史坦高域好快入第二球,最後國米大勝對手四個一皮。國米上半場初段踢到水銀瀉地,令全場五萬幾個球迷血脈沸騰。列高巴最抵死,話隊波頭二十分鐘好似電視遊戲嘅足球game一樣咁悅目,真架勢。