當年今日

新車速報:
2002年歐洲新車巡禮

蘋果日報 2002/01/07 00:00


早前,我哋《車天車地》版曾經為大家介紹過一系列有機會於今年內抵港嘅日本新車,相信唔少車迷都已經睇到「心郁郁」;而今日為大家介紹嘅呢批歐洲車,除同樣有機會於今年內抵港外,當中更有迷你小車、豪華房車及超級跑車,定能迎合唔同類型車迷嘅喜好㗎。各位歐洲車嘅擁躉,記住唔好錯過今日嘅介紹喇。

記者:Mark哥
林寶堅尼Murcielago
預計到港日期:2002年3月
估計售價:約290萬
有乜吸引:備受一眾車迷期待嘅林寶堅尼Murcielago,除造型予人有耳目一新之感外,新車所配用嘅一台6.2公升引擎(馬力輸出達580匹),以及全新兼極富跑味嘅車廂配搭,更成為此車嘅賣點;但據聞今年嘅配額經已售罄,有興趣嘅車迷就要明年請早喇。
福士Polo
預計到港日期:2002年4月
估計售價:約13萬
有乜吸引:現時仍在熱賣中嘅福士Polo,經已於去年推出全新版本,除賣相有變動外,就連車身尺碼亦有所增大,從而令車廂空間較前變得更寬敞;據聞本港代理將會於今年4月左右,引入新款Polo車系抵港,而當中最有機會引入嘅,會係能輸出75匹馬力嘅1.4公升型號。
福士Phaeton
預計到港日期:2002年12月
估計售價:約90萬
有乜吸引:為迎擊同鄉嘅平治S-Class及寶馬7系,福士將於今年內推出全新Phaeton車系,此車除造型極富豪邁氣息外,車廂設備亦見豪華齊全;另外,最有機會引入本港嘅3.2公升型號,係配用一台3.2公升V6引擎,馬力輸出高達241匹,用以驅動此車可謂綽綽有餘。
奧迪A4Cabriolet
預計到港日期:2002年7月
估計售價:約60萬
有乜吸引:曾在各大車展會場亮相嘅A4Cabriolet,可算係全球車迷嘅焦點所在。據聞香港代理方面,有意於今年7月左右將之引入;當中頂級型號所配用嘅一台3.0公升V6引擎,動力輸出充裕,配合上突出嘅賣相,相信當新車正式抵港時,定會再次掀起一場開篷車熱潮㗎。
賓利ArnageT
預計到港日期:2002年6月
估計售價:約300萬
有乜吸引:賓利全新嘅ArnageT,預計會於今年年中抵港;新車雖以同廠嘅ArnageRedLabel作為設計藍本,但佢所配用嘅一台6750ccTwinTurbo引擎,所迸發出嘅450匹馬力,以及0至100公里僅需5.8秒嘅加速度,就經已教人為之驚歎不已啦。
積架S-TypeR
預計到港日期:2002年6月
估計售價:約70萬
有乜吸引:S-Type一向予人嘅形象,都係較為成熟穩重;但新款嘅S-TypeR,則予人有刮目相看之感。除廠方為其裝上一身跑味十足嘅車身配件外,更為其裝上一台4.2公升嘅V8引擎,馬力輸出高達400匹,以增強其性能表現外;一套四輪18吋胎軨組合,配合上剛度十足嘅車架,更能令新車可有出色嘅行車表現。
福特Fiesta
預計到港日期:2002年8月
估計售價:約11萬
有乜吸引:福特Fiesta亦屬有機會於今年內抵港嘅車款之列,皆因此車除擁有別致吸引嘅賣相外,實用嘅車廂配搭更屬Fiesta一向嘅賣點。而引擎配搭亦有多個選擇,當中最有機會抵港嘅會係1.4公升型號,皆因可爭取小車市場嘅佔有率嘛!
越野路華RangeRover
預計到港日期:2002年7月
估計售價:約80萬
有乜吸引:越野路華自於去年公布有關新款RangeRover嘅資料後,不少車迷都期待着新車嘅來臨;當中新車所配用嘅一台4.4公升V8引擎,馬力輸出高達288匹,加上全新嘅造型及車廂配搭,全都成為新車嘅賣點。若然新車能於今年7月左右抵港的話,一眾同級對手定會「有得震,無得瞓」喇。
平治SL
預計到港日期:2002年8月
估計售價:約130萬
有乜吸引:早前代理曾邀請各大傳媒到澳門測試嘅全新SL跑車,預計快者可於今年8月左右抵港;新車暫時只有一台5.0公升V8引擎作動力核心,馬力輸出高達306匹,再加上極富吸引性嘅造型,相信一眾車迷定會俾佢深深吸引住㗎。