【本報訊】疫情嚴重打擊珠寶製造業，香港珠寶製造業廠商會主席杜源寧透露，受各國封關等影響，行業正經歷「百年難逢一遇」的困境，絕大部份廠商生意額僅剩約一成。他更預料，未來一至兩個月將到達可承受的臨界點，估計三至五成廠商可能倒閉，或包括國際知名供應商。「我哋搵生意渠道比較傳統，通常都係依靠展覽會招攬生意，但疫情關係停晒，生意直頭跌到落谷底。」

展覽會改期未獲退款

杜源寧又指，原由英國上市公司Informa Markets在6月主辦的香港珠寶首飾展覽會，主辦方在未與參展商達成共識下，突告知展覽會改於11月舉行，地點亦由灣仔會展改至亞洲國際博覽館，同時更與廠商會舉辦的另一個珠寶展覽「撞期」。

廠商會近日接獲數百個廠商投訴，指Informa Markets未就展覽會改期，向參展商v 退款。「我哋對佢咁嘅做法真係好詫異。展覽會舉辦唔成，一般慣例都會安排退款，再畀大家重新申請。現時大家生意咁差，仲要責咗幾十萬元展覽費冇得退，真係雪上加霜。佢哋殺雞取卵嘅做法，到底有冇盡到社會責任同行業共渡難關？我哋不排除採取法律行動，拎返筆救命錢。」本報昨曾透過電郵向Informa Markets查詢，惟未有回覆。