蘇有朋今晚出席澤東廿五周年晚宴，啱啱去完峇里出席完好朋友吳奇隆婚宴嘅佢話﹕「好開心，大家都玩得好high。」咁你做伴郎有冇做人情封大利是先？佢話﹕「我去做伴郎就已經係最好嘅禮物，諗都冇諗過做人情。」吳奇隆講「愛的宣言」嗰陣你有冇覺得好感動呀？佢話﹕「我要做伴郎忙住影佢，冇咩點聽到呀。」知唔知佢哋幾時生小朋友呀？佢話﹕「呢樣嘢要睇佢哋能力喎。」

另外，記者問到佢哋有冇趁呢個機會小虎隊三個人聚下，佢話吳奇隆比較忙，反而同陳志朋就有傾下偈。有網傳陳志朋個樣唔同咗，又話佢俾火燒親，蘇有朋聽到之後勁大反應﹕「嘩！有冇傳到咁誇張呀！佢只係呢排忙於操練，應付5月21日喺北京有演唱會，練到個人又黑又瘦，我見到着西裝都瘦咗兩個size呀！我就睇唔出佢個樣有咩異樣。」另外佢提到自己今日係以導演身份出席，聽日會有首映。