當年今日
關於我們

【屢戰屢…】黎諾懿欲憑《BB來了》續集爭視帝? 「每次都冇人理我」

蘋果日報 2019/07/02 16:18

BB來了李佳芯黎諾懿視帝

黎諾懿今日到商台宣傳昨晚首播的旅遊節目《懿想不到》,今次他參與度極高,最初構思時想做一個懷舊節目,因為發現不少傳統美食因敵不過舖租及人工,而結業失傳,本想以他自己去拜師學藝為主,最後公司提議加入嘉賓,讓畫面更豐富,黎諾懿說:「邀請對自己好重要嘅人出現,第1、2集有鄭伊健,之後有家燕姐、鼎爺(李家鼎)、李佳芯(Ali)。Ali就最開心,大家知佢身體唔好,拍《BB來了》仲做咗次好大嘅手術,我同佢講有個節目叫佢嚟玩,唔使記對白,我會安排好所有嘢,佢初頭都唔信我,之後就好似變番少女咁玩,希望畀大家見到嘉賓另一面,例如伊健大細路嘅一面。」
講到黎諾懿跟Ali合作《BB來了》口碑好好,他透露將於10月,將以原班人馬拍續集,故事骨幹以上次結局之後2年開始,「允豬」長大後,夫妻要面對搵學校讀書等生活問題。問到開拍續集是否想挑戰視帝寶座?他笑說:「其實我每套都挑戰,但每次都冇人理我。好似《懿想不到》咁,我都係挑戰綜藝節目,想得到最佳節目主持。」他覺得凡事都要定下目標去挑戰,至於是否成功就是另一回事。
-----------------------------
7月4日起 《蘋果動新聞》只限升級壹會員閱覽
繼續撐蘋果!