當年今日
關於我們

工業政策 - 左丁山

蘋果日報 2002/01/15 00:00


廠家朱做成衣出口,同一件貨自然收同一價錢,但在美國零售連鎖店掛上價錢牌,就發覺同一質地、同一款式嘅衣服,會因地區唔同而賣唔同價錢。譬如一件恤衫在紐約曼克頓第五大道零售,會賣五十美元,但假若在曼克頓西八十街(舉例),就會賣平三十個巴仙以上。
一般嚟講,連鎖店Target嘅價錢平均計落最為便宜。左丁山以前都去過Target買衫,覺得好平,以為係啲次一皮貨色,經廠家朱提醒,先知道自己唔識嘢。
廠家朱同好多廠家一樣,好關心香港工業前途,怪責政府官員唔識嘢。佢話:「我哋班工業廠商曾經同工貿署官員開會,佢哋只識講積極不干預,話我哋識做生意,佢哋唔識,所以政府唔會特別扶助工業。講嚟講去,政府就係唔肯做事,我哋冇龍頭,點樣振興工業呀!」
左丁山雖然認同廠家朱嘅熱誠,但對佢嘅意見,不敢苟同。
啲工商貿易官員邊度識做生意呀?由佢哋制訂工業政策,領導香港工業界向前行,危險到極。啲廠家過往轉型發達、北上設廠,就係因為冇政府阻頭阻勢所致;假若政府喺八五年就訂下工業政策,阻止香港空洞化,唔畀工廠北上,你話得唔得呢?梗係唔得啦;又或者政府有獎勵政策,扶助電子工業,其他人一定會話唔公平。
新加坡扶助工業多年,𠵱家係唔係比香港掂好多呢?答案當然係No!