《香港大師》呢套以100萬拍攝嘅科幻電影，好似一個都市傳說咁，成日喺facecook見到呢個名，但就唔知幾時先有得睇，喺噚晚一班有心人搞嘅「坎坷影展」閉幕禮入面，《香港大師》就係閉幕電影。(詳見： http://bit.ly/2xbAFv4 )

喺電影完咗之後，《香港大師》嘅四位功臣就出嚟同大家分享心得，分別有男主角張進翹、編劇恐懼鳥、導演梁仲文同埋製片提子駿。由於係坎坷影展嘅關係，大會司儀就想導演講下拍攝嘅時候有咩坎坷事，梁仲文就話：「嘩，其實冇嘢係唔坎坷喎，要講坎坷事真係可以講到聽朝，實在太多喇。」

《香港大師》係由大陸投資拍攝，所以有觀眾問到會唔會有好多嘅限制，仲文話：「又冇喎，我冇刻意去加，都冇刻意去減。」

因為導演梁仲文之前嘅作品《關公大戰外星人》，係一條16分鐘嘅短片，仲不斷抽水，所以有觀眾就問到仲文點解今次《香港大師》冇乜抽水，仲文就話：「抽水都抽到唔想抽，同埋都抽唔到60分鐘啦，如果得嘅《頭條新聞》都可以拍電影啦。」

喺《香港大師》入面，導演仲文都講到其實有好多位，係向唔同電影、動畫致敬嘅鏡頭，不過有一個位，係仲文好強調係諗出嚟嘅，就係用激光劍點煙，仲話：「呢個真係我諗，如果係抄我會認。」

喺電影中有一個投射嘅關二哥，仲文就話呢個係一個佢自己開心嘅彩蛋，佢希望佢嘅作品入面，點都會有個二哥嘅出現。