立法會辯論財政預算案搞咗幾個星期，終於見到家鄉有望三讀投票，不過建制派唔知係咪個個呆坐抗拉布坐得太耐，作為投票機器嘅建制派竟然投錯票，好似前日表決407項修正案時，勞聯潘兆平就投錯贊成削減特首梁振英全年人工，不過去到財政預算案三讀投票，建制派再投錯票真係冇面見人，所以佢哋各自諗計防止再投錯。
好似潘兆平咁，八方見佢噚日好小心，搵枝筆擋住個贊成按鈕，保證自己唔會有機會㩒錯贊成支持泛民修訂，另外八方又見到，有建制議員索性用紙條貼住贊成按鈕，即係想㩒錯贊成都㩒唔到，咁做更加萬無一失啦！

經民聯林健鋒同八方講，佢就自創「V字」手勢投票大法，即係同時用食指、中指㩒掣投票，剛好係食指㩒「出席」，中指位剛好㩒到「反對」，實唔會投錯票喎！
而平日開會不時搵周公嘅民建聯黃定光，自言準備咗筷子去開會，不過唔係入會議廳開餐，而係用筷子代手指投票！呢個筷子投票大法有乜特別？佢話咁就唔使成日俯身向前㩒掣，用筷子篤就得！咁都諗到，八方都寫個服字，之不過呢兩日建制投咗幾百次反對票，今日預算案三讀投票，會唔會到三讀時慣咗手勢，唔覺意「反對」呢？

李八方
mailto:[email protected]