曾經紅過一時嘅韓國組合H.O.T成員安七炫，自從佢2010年退伍後，聲勢已不大如前。

現時佢專注主持電台節目《KangTa的星光閃耀的夜晚》，前日主持嘅一集就以「怎麼樣呢？」做主題，分享同嘉賓有關愛情嘅故事。

而節目中，安七炫仲玩爆料，自爆過去同女友嘅點滴，當中佢提到曾經同女友一齊去見朋友，安七炫原本想做廿四孝男友，喺現場餵女友食魚生，又斟茶遞水畀女友，點知女友竟然唔領情，仲發脾氣走咗，令安七炫摸不著頭腦，唔知錯啲乜。

其他嘉賓就話佢咁做就好似成為咗女友阿媽一樣，覺得佢多此一舉咗。嘉賓亦都好奇到底安七炫所講嘅女友到底係邊位，仲即刻問佢係唔係圈中人，安七炫都好大方直認話係圈中人，佢又自爆當初到女友好快就開始拍拖，又直認對方係佢嘅理想型。

雖然安七炫同對方已經分咗手，但唔少網民就估計佢所講嘅就係女團f(x)嘅中國成員Victoria(宋茜)，事關安七炫曾經讚過Victoria，又話佢係自己嘅理想型，加上又試過唔避嫌上載同Victoria嘅合照，令到大家都估計兩人曾發展過一段情。