社民連立法會議員梁國雄「長毛」今日親證，有人曾開出1億利誘他對政改方案投贊成票。立法會主席曾鈺成形容事件「奇怪」，不太相信，「你諗下香港咁嘅地方，如果真係有泛民打破綑綁承諾轉投支持，一定俾人查㗎啦」。他重申如果政府爭取到一定贊成票，需要他決定性一票時，收到政府通知後就會辭職投票通過政改。

他希望政改有轉機出現，但現時「睇唔到點樣可以做得到」，「我講政改有機會通過你都唔信我喇」，又引述上月基本法委員會主任李飛說法，指就算重啟五部曲後「都仲係8.31決定」。

被問到周三表決政改，立法會外可能出現的衝突，他相信任何違法行為都不會得到支持，指行管會周一開會商討具體做法，保證會議順利進行，以及任何時候出入大樓的人士，人身安全不受威脅。