37歲嘅黃翠如同41歲嘅蕭正楠拍拖4年，原來今年中已經秘密結婚。

蕭正楠噚晚喺無綫直播《萬千星輝頒獎典禮2018》期間爆驚喜，當黃翠如同洪永城頒「最受歡迎電視拍檔」獎畀蕭正楠同曹永廉時，蕭正楠突然爆出一句：「多謝我太太黃翠如。」全場嘩聲四起。

由於蕭正楠同翠如之前喺華景山莊同居，所以翠如噚晚自己揸車去咗大埔康樂園，經訪客位入閘，所以都唔知佢係探朋友定係返新居。直至今日12點幾，《蘋果》記者發現蕭正楠一個人揸車離開康樂園，先至確定呢度原來係佢哋新愛巢，同張栢芝及許冠傑做鄰居。蕭正楠揸車直駛去無綫將軍澳電視廣播城，記者未有機會埋身同佢做訪問。

不過，今日凌晨12點幾，蕭正楠完咗台慶頒獎禮之後接受傳媒訪問，講到第一次求婚衰咗（相關新聞： https://bit.ly/2LnyIkr ），要第二次求婚先至成功。蕭正楠話佢同翠如係今年4、5月喺新西蘭註冊結婚，當日只得佢哋兩個人，但事前已經通知咗父母，至於會唔會補擺喜酒，蕭正楠話會再翠如傾傾。

精選娛聞，喺晒《娛果》
http://fb.com/appledailyent