樸茨茅夫嘅英格蘭門將占士，最近雖然喺球場上表現麻麻，上一仗英聯盃被車仔數4蛋，之前一場聯賽又吞曼城6隻蛋；不過好彩佢識得透過藝術減壓，最近仲成為咗一本兒童圖書嘅插畫師㖭！
占士由於外形唔錯，做模特兒呢份兼職就係人都知，不過原來佢都好有藝術天份，最近仲處男下海，替一本名為《哈利的神奇口袋》（Harry'sMagicPockets）嘅兒童圖書畫插畫。占士話：「我之前從未試過做插畫，但係就好鍾意呢個挑戰，我覺得最難畫嘅地方，係畫中嘅小丑同小朋友，都係按真人而畫嘅。」占士仲話，畫插畫可以減壓：「通常喺球隊作客嘅路途上都頗為沉悶，畫插畫就可以消磨時間同埋減壓，特別係替英格蘭作客時，我一有時間就匿埋喺酒店房畫畫㖭！」

下本畫朗尼奧雲

占士仲透露，佢下一個大計係畫一本有關足球嘅兒童圖書，而佢嘅國家隊隊友奧雲同埋朗尼，都會成為書中人。占士話：「朗尼曾經叫我幫佢畫人像，但我冇時間咁做，既然我下一本書係以足球為主題，我就一於搵朗尼同埋奧雲做書中人，一舉兩得！另外，我知道意大利人一向有藝術品味，我希望如果英格蘭領隊卡比路有時間嘅話，可以睇吓我嘅作品，俾啲評語咁囉！」
睇占士講到興致勃勃，似乎好有興趣向呢方面發展，我求大俠都覺得無可厚非，因為佢已經38歲，球員生涯差唔多到咗黃昏期。不過我求大俠就想提醒佢，喺佢一日仲要替樸茅或英格蘭把關時，千祈唔好淨係掛住畫插畫，搞到心不在焉，喺球場上出醜呀！