紅灣半島醜聞，都唔知點收科，鬍鬚孫賤賣土地，地產商在商言商，污染無道，不過拆樓有理，環保團體同埋民間，一致怨氣沸騰！
若然呢個政府有強勢行政主導，或者有集體責任制，咁其他官員，係咪寧願收口唔出聲，都唔好加把口一齊柴台先？
不過，主管環境及運輸嘅廖冬冬，一向大情大性，今次就加把口入嚟，話「絕對唔支持」紅灣半島拆卸喎！咁無形中，即是環保反拆派，得到咗一名問責高官撐腰，勇鬥地產商，狂踩孫明揚，有冬冬撐腰，當堂如虎添翼㖭。
最好笑嘅就係冬冬竟然話，佢個人認為，拆卸紅島，一定要做到「零廢物」，呢啲說話，學足共官口氣，例如工業要做到「零意外」，建設要做到「零浪費」，零乜零物，好似好強人作風，不過好可惜，團夥呢個失敗班子，七年半以來，展示嘅係「零IQ」，用人管理有冇「零廢料」？睇吓三屍十一焗，加埋阿董自己呢個班底，咪一眼望晒囉！