姜文杰（Benji）向來都熱愛音樂，趁住聽日係香港電視開台日，Benji特別趕製新歌《幾比幾》，準備聽日開台時獻唱，屆時佢仲會唱埋《ChristmasSong》，今次喺演出，Benji仲自資今個月嘅人工，邀請一班10幾歲嘅舞蹈員嚟伴舞，呢份禮物認真唔惹少！

Benji指自己係HKTV一份子，應該要向公司送一份有少少誠意嘅禮物，佢話：「其實都唔係第一次，之前拍《童話戀曲201314》，我將成份近6位數字嘅人工放喺《第二人生》一場演唱會戲份上，雖然我冇份演，我同妹妹只係幫手負責唱嗰PART，但我唔想馬虎，因為我覺得一間電視台可以BOOK機場博覽館去拍一場演唱會戲，已經係佢哋嘅誠意。」

對於港視由零開始至成功開台，Benji指心情有起有落，佢話：「中間呢段時間，我多謝公司畀機會我，上浙江衛視參加《我不是明星》，喺台上面講起喺香港做藝人嘅經歷，都會諗起喺HKTV一啲辛酸史，未必咁理想嘅光陰，我都忍唔住喊咗好多次，帶住少少成績返到嚟，我終於知道可以開台，仲打嚟叫我喺開幕典禮度唱歌，我要多謝廣告客戶、王維基先生同工作人員，我唔希望淨係上去求其唱首歌，我唔想咁馬虎，所以我將今個月人工邀請一班舞蹈員，作為我送畀公司最後一份禮物，因為幾個月之後，我份約就完，我唔知之後路向會係點。」

有冇向王維基提議開一個音樂節目﹖Benji話：「最初開會時有提過，仲問可唔可以唔好好似我之前做嘅音樂節目安排喺半夜3點鐘播放，唔好變成遊戲節目，我諗依家係要睇開台後嘅反應，如果夠人數，我相信王生唔會放棄音樂呢方面。」

攝影：陳慧安