樂隊Supper Moment（SM）今日喺銅鑼灣出席街頭派對，對於SM以一首半打入商台嘅「我最喜愛的歌曲」十五強，包括《橙海》以及同日本樂隊Survive Said The Prophet合唱嘅《To Whom》，阿達笑指懷疑有啲係日本票源，Sunny話：「對我哋嘅音樂好有鼓舞，我都有叫大家拉票，投自己鍾意嘅歌，我哋呢兩首歌，原來大家鍾意，我哋好開心，希望大家繼續支持。」不過Sunny表示對獲獎冇乜信心，阿雞謙稱：「有一首半入圍已經好欣慰。」

講到陳奕迅同張敬軒只有一首入圍，Sunny話：「唔係咁計嘅，可能我哋嗰啲係包尾呢？每年都有咁嘅情況，大家用頒獎禮去睇樂壇嘅生態，但其實每位音樂人都有好多嘢做，我哋希望可以同唔同單位合作。」提到MIRROR有份打入「我最喜愛的組合」五強，SM話：「MIRROR好勁，人又多，如果有埋ERROR就最好。」

此外，談到政府考慮修訂條例打擊黃牛黨，阿達話：「絕對支持，政府同單位肯討論係好事，肯面對好過唔解決問題。」黃子華唔同意以實名制，因有侵犯私隱之嫌，CK表示：「好多人都話未必可行，正如陳奕迅之前嘅音樂會用實名制，入場都要3、4個鐘。」

精選娛聞，喺晒《娛果》
http://fb.com/appledailyent