有時真係唔知梁班子想點，明明「全港性系統評估」（即TSA）受到唔少師生同家長反對，但梁班子卻堅持硬推，林鄭今日話爭取擱置今年5月小三TSA，特首梁振英隨即極速落閘話唔畀，似乎唔想畀新任特首，攞到掌聲。

身為林鄭競選主席團身員嘅全國政協委員林大輝，對CY以及教育局局長吳得掂有幾like，怕且八方都無謂多提；佢今日喺CY落閘後出稿，話TSA令唔少學生苦不堪言，現屆政府卻無動於衷，對CY拒聽民意極度失望，指現屆政府只剩幾個月任期，若然強推後新一屆政府又擱置，朝令夕改只會苦害學生同家長無所適從。

繼而呢，佢又提到吳得掂嘞。佢話吳得掂上任之初推行國民教育失敗，引起社會軒然大波，結果政府被迫宣佈在任內擱置，而比較之下，國教肯定畀TSA重要啦，反問點解國教可以叫停，TSA卻不能？指各界已對TSA政策失去信心，如然硬推只會進一步撕裂社會。

話說回來，都係CY最大責任，大輝批評CY口口聲聲話要做好同下屆特區政府嘅交接安排，支持同配合新特首施政，「但講一套做一套，更將學生變成磨心」，「懇請」佢同吳得掂為學生嘅福祉同下屆特首嘅威望著想，重新考慮林鄭嘅要求，暫時擱置TSA，好好配合候任政府嘅工作。