10月開播嘅多套日本新劇都以一線女星作招徠，篠原涼子、米倉涼子、綾瀨遙、小泉今日子同埋小休復出嘅井上真央都各自有新劇對撼，搞到不少合演男星都慘成陪襯。篠原涼子今次效力富士電視台，為「月9」檔重頭劇《民眾之敵》扮演踩入政壇嘅女強人。《民眾之敵》已定10月16日開播，篠原涼子夥拍人氣男星高橋一生合作，44歲嘅篠原涼子日前同前田敦子趁開工期間戴上可愛頭飾賣萌，被讚似孖生姊妹。

同時，大肚女星武井咲同型男藤岡靛合作嘅NTV新劇《我可以威脅你嗎？》都同於10月開播，電視台望靠武井咲奉子成婚消息可刺激收視。至於藤岡靛去年於日本爆紅，不過日本觀眾近年經常轉口味，雖然佢曾經被師奶們視為頭號偶像，可惜早前一項網上投票，100名女性網民票選「好快消失的上位男星」，點知藤岡靛、高橋一生同埋《逃跑雖可恥但有用》主角星野源都打入三甲，藤岡靛更不幸地於100票中佔57票，而星野源、高橋一生各硬食23票及20票。