全球最大型兼獎金最高嘅「世界麻雀大賽」噚日喺澳門威尼斯人酒店開波，有200個來自世界各地嘅高手參賽，人數係預期嘅五分一，但亦吸引到名人參賽，包括04年因參加《全美偶像》（AmericanIdol）憑《SheBangs》一曲成名嘅孔慶翔（WilliamHung）。William話想成為麻雀王，再次為港爭光，實行做唔成歌神做雀神喎。

William自從同家燕姐拍完電影《我阿媽發仔瘟》之後，就好似人間蒸發咗咁，噚日佢重出江湖個look冇乜大變，喺台上打牌嘅手法亦好純熟，唔似生手。佢同八方講，兩年前參加過一次慈善麻雀賽，覺得麻雀多變化，講運氣之餘又要技術，所以就被13隻深深吸引住，幾乎不能自拔，成日約朋友打又打onlinegame，今次仲代表埋網上遊戲公司參加麻雀賽，希望做雀王。
問佢鍾意唱歌定打牌，28歲嘅William話兩樣都咁鍾意，但就坦言家以麻雀為重，因為雀王至少有幾十萬收入，仲話佢啱啱喺美國CalStateNorthridge大學數學系畢業，對打牌唔多唔少都有幫助。但問到佢心得，佢就只係話唔好出銃，睇嚟要打敗一眾高手有難度。講到演藝事業，佢話曾經喺香港拍過一套戲同出過三張唱片，但星運始終麻麻，但唔會就咁放棄，家周不時都會登吓台，保持知名度。

今年雀王大賽踏入第三屆，主辦機構原本為吸引更多人參加，將報名費由5,000美元減至5,000港元，點知參賽人數未如理想。由於獎金與參賽人數掛鈎，今屆嘅總獎金由過去嘅100萬美元（約780萬港元），大減至100萬港元；冠軍獎金亦將由390萬縮水至得番幾十萬元。
獎金縮水，上屆雀王何國雄坦言提唔起勁打牌，但仍會盡力衞冕為港爭光。佢又話大會改賽制又多新手參賽，打亂咗佢嘅部署，「連雞糊都可以食，好多人都搶糊」。上屆季軍、準教師林浩楠就自言表現唔錯，只要今日保持水準，就好大機會晉身聽日嘅決賽。

mailto:[email protected]