「長腿Oppa」李敏鎬今晚喺香港亞博館開騷，喺開騷前嘅記招上，李敏鎬就好有野心地表示想向香港巨星周潤發挑機，挑戰發哥喺電影《英雄本色》嘅Mark哥角色。
:
問到李敏鎬之前擔正嘅韓片《江南黑夜》同香港經典電影《英雄本色》好相似時，李敏鎬就覺得兩者都存在有關親情嘅感情戲，所以相似。

被問題如果有機會重演《英雄本色》時，會想演出哪個角色，李敏鎬話：「如果依年齡嚟睇，我會演出張國榮嘅角色，但講有野心嘅話，當然係挑戰周潤發嘅Mark哥角色。」

李敏鎬仲透露有收到香港劇本，不過仍未決定會唔會演出，不過表示自己好鍾意香港電影，亦希望演出海外電影。

李敏鎬亦透露自己正挑選理想嘅劇集作品，希望其後可以透過好作品同大家見面。他更表示自己一直有意學習中文同英文，不過因為今年太忙，希望下年可以做到。

喺之後嘅訪問中，李敏鎬對於自己嘅歌藝就評價五十分，解釋自己本身係個演員，所以歌藝始終不算專業，唔可以作太高評價。他又透露自己近來愛上Hip-Hop音樂，因為有助減壓。