山東墨龍（568）預期PE得番3倍幾，集團又有大客射住，長做長有，要昅昅。墨龍主打石油鑽採機械設備及相關部件產銷，單係08年半年度（6月底止），純利就翻咗半番到1.4億銀人仔，已經好省鏡。又8月時分，報道話墨龍承接定單，已經遠遠超過本身產能。墨龍可以見到嘅短期，已經坐定粒六。保守計數，墨龍08年度純利keep住半年度增幅，翻半番到3億銀，預期PE得4字頭。
再講，墨龍啱啱喺年中，又同俄羅斯SCPG簽訂長期協議，未來3年期間，分別提供唔少過6萬噸及9萬噸油套管。有大客射住，墨龍長做長有，繼續肥仔水。09年度純利係咁意增長20%，預期PE進一步落到3字頭單位數。參考多家券商建議目標價，墨龍要見0.90元至1.20元不等，以最低目標參考，墨龍現價（0.415元）都要翻一番，預期PE6倍幾，仲係好殘。

中國消防殘到爆

中國消防（445）連創業板年代計，現價（0.22元）貼近上市以嚟低位，相對最新NAV0.55元折讓60%。類近股海灣（416）啱啱月頭，就獲花旗國上市公司UnitedTechnologiesCorporation（UTC）提全購，UTC所提每股全購價3.38元，講緊係海灣NAV1.40元嘅1.4倍。又中國消防最新每股淨現金0.21元，同現價差無幾，中國消防真係殘到爆。嚟轉冷吼，博中國消防係咁意上番0.6倍P/B，股價講緊要翻半番到0.33元。
錢雋