李克勤好惹是非！入行30年經常被曲線或直線抽擊，究竟佢喺呢行有冇仇人呢？克勤坦言：「嗱！以前後生可能有，即係20歲嗰時年少氣盛，唔鍾意就唔鍾意，但o依家已經變朋友，因為人大咗，覺得都係芝麻綠豆唔重要，o依家諗唔到邊個同佢有仇，殺你全家先係仇，其他唔覺得去到仇字咁嚴重。」

咁多年嚟，克勤嘅言行都受到網民熱議，咁有冇怨過網民呢？克勤表示：「冇乜嘢要怨，送下禮咁啫，你咪當開下玩笑囉。」有冇嬲過「送禮勤」呢個花名？克勤笑笑話：「好『輕can』啦，做得呢行咪當娛樂大家，送禮係美德，而且嗰件事，我又覺得錯不在我，如果你覺得唔夠有型，咪唔夠有型囉，如果你覺得呢個名令你開心，我又唔介意，barcode嗰啲冇乜嘢幾好笑，咪睇我樣眉精眼企，間唔中都會『乜嘢』下。新歌《30克》講過往30年喺我身上發生嘅事，有啲自嘲，我都有提番曼聯冇收我禮物，作為呢個年代仲喺娛樂圈活躍嘅藝人，如果連一個咁簡單都接受唔到，你條線未免訂得太高！」

克勤冇怨過網民，咁有冇嬲過王喜呢？前年克勤參加江蘇衛視歌唱比賽節目《蒙面歌王》，戴面具化名「白棱鏡」出戰首集攞第一，有網民封佢做「零瑕疵歌王」，亦有網民批評面具兒嬉，王喜更喺facebook貼克勤參賽短片留言：「自貶身價」！克勤慎重答：「首先我同佢唔熟，唔係特登要反駁，我覺得o依家有啲朋友，覺得香港藝人返內地做節目，有時見到佢哋做多咗嘢，喺香港做節目唔係咁，尺度唔同咗。」

克勤認為其實係兩地文化差異問題：「內地節目為內地觀眾而設，如果以香港標準可能未必啱睇，香港藝人做內地節目當然要配合要求，至於話自貶身價，點解一定係貶呢？凡事我覺得由邊個角度睇，參加節目不外乎兩樣嘢，想攞到龐大市場知名度同金錢利益，淺白啲講句，都係搵食啫，你話貶唔貶，我又會覺得，如果歌手代表你嘅地方打入內地市場，對於香港人嚟講，應該戥佢高興啦！」

採訪：余燕儀、懷鈺
協力：劉嘉慧
攝錄：馮峰、Neo
攝影：葉君海
場地：祥勝茶餐廳
造型：Queenie Yu
髮型：Adolph Bow
化妝：Angel Y