當年今日
關於我們

地產多聲道:
中原軟銷 四季雅苑帶記者花天酒地

蘋果日報 2003/11/27 00:00


代理搞記者會,選址愈嚟愈刁鑽,近年開始興起私房菜,比較出名嘅菜館,好似董家菜、PoisonIvy、黃色門同食家菜等等,代理或者發展商都揀過嚟開記者會。噚日中原為四季雅苑開嘅記者會,又發掘咗一個新地方,位於銅鑼灣百德新街一幢舊樓,名為「花天酒地」嘅法式私房菜館。
原本三房兩廳嘅住宅單位,飯廳就擺放可以容納十幾人嘅餐枱,而房間就可以當做VIP房,布置得相當特別,橙色嘅牆重有好多油畫等擺設,充滿古典味。中原話揀呢間私房菜館,就係為咗襯番四季雅苑個法國風情。蘭西真係好佩服佢哋咁識「搵食」。
另外,下月個十五號之前,經中原買四季雅苑,有機會獲贈價值二萬八千蚊嘅法式私房菜入伙宴,名額三個。周末睇樓人士可以獲贈紅酒一支。

美聯送優惠不合時宜
市區豪宅何文田君頤峰,現址已經開始拆棚,預計出年五月入伙,不過,因臨近普天同慶嘅聖誕節,美聯物業又要搶佔先機,同呢個樓盤搞聖誕節優惠。
由即日起到下個月底,透過佢哋買君頤峰相連同埋複式單位,送出八萬八蚊嘅聖誕節裝飾,包括聖誕樹同埋燈飾,名額三個。買分層單位嘅買家,原有物業經佢哋放售,就免收佣金,但就要下個月十號前入市,名額五個。
雖然送贈嘅優惠幾應節,但新樓未入得伙,買家收到嘅裝飾要搵地方擺。如果𠵱家住緊嘅物業,地方唔夠大,擺唔落棵聖誕樹,唔知可唔可以要求將八萬八蚊折現,用嚟食聖誕大餐呢?
越秀樓盤改名貴氣十足
中國人好注重意頭,所以改個好名,可以話係成功嘅第一步。越秀地產嘅薄扶林華富道八號豪宅項目,啱啱改咗名,叫「富臨軒」,聽個名都夠晒貴氣。
越秀投資營業部經理羅天信解畫話,個盤位處港島南區,係富豪名人聚居地,又臨近公園同著名學府。
而樓盤最高嘅三十二同三十三樓四個相連單位,因為「高高在上,君臨天下」,兼擁山海,特別命名「富臨天下」,面積約一千六百方呎,初步意向呎價約五千蚊。樓盤已申請賣樓紙,好快推售。

國金二期搞跑樓梯比賽
中環國際金融中心二期,租務情況唔錯,發展商之一嘅新地,早排招呼咗新地會會員參觀。聽講明年無線電視會同國金搞活動,就係跑樓梯上國金二期。國金二期有八十幾層,絕對係一項挑戰。
蘭西記得當日發展商披露國金二期嘅資料時講過,搭𨋢由地下到頂樓要兩分鐘,由頂樓行樓梯落地下要二十三分鐘,如果由地下行上去,肯定好辛苦兼索氣,跑完之後就可以知道最快要用幾多時間嘞。唔知第日會唔會年年都有跑樓梯活動呢?呢類活動外國都有定期舉行。
置邦致力搞好鄰舍關係
物業管理公司近年積極提供更多增值服務或舉辦公益活動。置邦行政董事夏華倫話,明白到「遠親不如近鄰」嘅道理,所以特別喺「社區互聯網」上增設住戶通告板。
住戶可以喺通告板交流訊息,例如單位租售、車位租售、學童各科補習資料、電器家具買賣同贈送家具等。
另外,信和物業管理公司就搞咗幾個活動,為宣明會辦舊書義賣、幫公益金同香港幼兒教育及服務聯會籌募經費等。
蘭西
電郵地址:[email protected]
empty
呢棵聖誕樹相當靚,但君頤峰買家未必啱用。
empty
薄扶林項目已命名為富臨軒,相當好意頭。