2011年嘅港姐冠軍朱晨麗，近年喺大台主力拍劇，最近佢係新劇《特技人》擔正做女主角，呢排都忙住做宣傳。日前《蘋果》喺將軍澳見到佢，頭戴白色cap帽，身穿藍色連身裙，仲戴住金色圓框眼鏡，難得偷得浮生半日閒唔使開工，佢一個人喺popcorn商場一間泰式餐廳度嘆下午茶，其間見佢喺度傾電話。

朱晨麗大概坐咗個零鐘就埋單走人，之後佢行去商場另一邊，行咗入書店，當時書店都幾多人，有途人認得佢，仲望佢兩眼，不過佢一於少理，繼續睇書。見佢行去烹飪書架度睇咗好耐，其間佢攞起李家鼎最近新出嘅粵菜烹飪書嚟睇，本身係蘇州姑娘嘅佢，唔通對粵菜有興趣？

除咗烹飪書，佢仲睇吓心理書。打完一輪書釘，又行去一間家庭用品店睇煮食煲。之後佢又行去一間鞋店，店員認到佢係朱晨麗，好殷勤咁介紹鞋款畀佢，不過佢睇咗一陣，好似唔係幾啱，最終冇買到。

一輪window shopping之後，朱晨麗行出商場過對面馬路，佢喺幾間地產街舖度望望吓時，一位男地產經紀飛撲出嚟，同朱晨麗好好傾，對方仲叫埋同事、一位女地產經紀出來打招呼，估計佢哋喺認識，因為朱晨麗住喺將軍澳，唔知係咪街坊呢！佢哋傾咗成半個鐘，大家有講有笑，其間朱晨麗望一望電話之後，就拿拿聲行去返公司嘅巴士站，原來架巴士差唔多夠鐘開車，佢趕緊去排隊上車返公司。

精選娛聞，喺晒《娛果》
http://fb.com/appledailyent