大家有無試過畀啲資歷或能力低過自己嘅人點番轉頭，以為你咩都唔識？喺直播時，間中都見比賽中隊友間互相指罵，雖然係英文或其他語言，但都係類似「做咩唔交波呀？」，或者「我使咩你教呀？你好好波咩？」呢類反唇相稽嘅說話。

自以為了不起

成隊波個個資歷唔同，水準可能有偏差；但落到場，做得隊友點都要講個「信」字。就算點不滿，都應該等完場後，賽後檢討時先拎出嚟講。我覺得喺球場上，唯一要畀人買佢怕嘅就只有教練。唔係大家互相信任又點成軍？仲有埋怨對方嘅同時，埋怨人嗰位又有無諗過，自己係咪又係咁好波呢？
其實我跳舞嗰時，都試過畀高我一屆嘅師姐，恃住跳舞資歷多我1年，向我擺阿姐款，例如話：「Wendy，你跳到呢度，記得唔好遮住我！」，又或者話：「你應該咁樣跳。」但係佢手腳都唔協調嘅！我個心雖然有啲唔服，惟有努力跳得好過佢，以圖叫佢收聲，但俾佢話緊嗰陣，真係幾惡忍。所以無論係踢波抑或跳舞，都唔好咁多聲氣！
WENDY
由歐國盃EuroBabes，變身球彩台受歡迎主持。