谷中夜馬今晚（6日）跑足九場，最尾第九場二班1800米，由華人騎師蔡明紹，夥拍師傅告東尼馬房新勝馬「中華盛世」，貼欄由頭帶到尾，閘前落飛得手成功連捷，今場單Win及組合獨贏A2分別派56及22元。

才三歲的法國自購馬「中華盛世」曾贏法國1400米三級賽諾卓亭大賽，亦於法國1600米一級賽尚盧利加迪大賽跑第四，頗具級數。

上次「中華盛世」季內初出，即谷草一哩爆半冷打開勝門，這晚在同一騎師蔡明紹胯下，加程至1800米，輕易克服最外12檔，本身起步後火速埋欄，就此直領到底，以頸位之先擊敗亞軍「達羅素」，成為告東尼季內首匹連捷馬。

「達羅素」上仗能擊敗澳洲維多利亞打吡冠軍「不可思議」，以此推算，現評89分跑得不多的「中華盛世」，下月轉四歲後，絕對有潛力問鼎本屆香港打吡寶座。

蔡明紹近日手風順屢傳捷訊，包括剛周日（3日）跑毛里裘斯馬場騎師賽，勝出最後一關賽事，個人連同之前兩個本港賽日都有馬贏，累積連勝四次海內外賽事冇斷纜，表現突出。

第九場二至四名依次為「達羅素」、「萬馬飛騰」及「雷公鑿」，其中有熱有冷，四重彩派二萬七千幾。

當中「達羅素」騎師莫雷拉整晚騎足九場，共取三冠兩亞全屬非騎師賽及騎師王場次，騎師王四關卻全軍覆沒一分都冇。