光大控股（165）出售投資項目，件件都啖啖肉，家陣亦係喺2015年大插插之後低位上落，又係殘到冇朋友。

光控啱啱月頭公布，今年內沽出分眾傳媒（深002027）合共1.19億股，總代價16.4億港元，估計出售收益13.7億港元。事實上，光控喺上年，先後出售銀聯商務，同光大安石房地產同光大安石資產管理等項目，分別獲收益6.3億元同17.9億元。睇到係，光控無寶不落，一變現沽售，獲利增值和味龍。

又今年8月時份，報載光控管理層話，今年下半年可退出項目不下20個，亦諗到，光控有佳績，無論以乜嘢模將項目退出，應該享受到肥仔增值同獲利。而據光控管理層講，家陣集團心儀瓣數，包括醫療、醫療信息同養老。就最後一瓣，集團亦喺8月，同海門市人民政府等，共同設立目標規模20億元人仔嘅健康養老基金。亦睇到，光控食住大潮流，投資喺勁厚需求項目上，隨住新投資煲熟，亦一樣俾同光控肥仔增值。

光控未計呢啲潛在資產增值前，家陣PB 0.76倍，場內專業預估集團今、明兩年PB，都係得0.72倍同0.66倍。光控今年上半年EPS約0.87元，增長10%，場內專業預測，集團今年全年EPS1.83元，下半年EPS 0.96元，比上半年好，預測PE 8.6倍，明年EPS去到1.92元，PE再進一步調整到得7.7倍，殘到爆！

數咁計，當光控上番1倍PB咁計，現價17.08元，講緊要升近40%到23.7元，光控2015年瘋牛期最高位，係講緊30蚊。

錢雋

蘋果財經，關心你飯碗
http://fb.com/appledailyatm