近排大台播緊嘅劇集《同盟》，雖然都係一般嘅槍戰追車等老土戲碼，但係今日就先唔講劇情，反而要講一下網民嘅「二次創作」究竟有冇極限？

話說大台劇集《同盟》有一場姚子羚被擒之後喺貨車同啲敵人大打出手嘅戲碼，本身呢場戲嘅睇頭就梗係姚子羚騷腿踢腳嘅場面啦，不過身為網民改圖「愛將」嘅「表哥」圖，網民今次又點會放過，最估唔到嘅係網民嘅創意真係無極限，一場簡簡單單嘅車廂打戲都可以變成「表哥蛙式漫遊記」，由一踢腿開始，姚子羚就由車廂踢到入宇宙，一路踢腿就一路飛，後尾仲潛埋入海，夠晒抵死。

而打鬥戲最後就係陳山聰追到貨車，一開門就見到姚子羚冇事，而網民連文戲都唔放過，以為踢腿環遊完就算啦，點知一開門，經典嘅「表哥」又再次出現係眼前，而山聰都冇得幸免要齊齊變臉。呢段片喺網上流傳咗數日，引起極大迴響。

本身都以為就咁完，點知網民又有新搞作，前晚新鮮出爐嘅港姐冠軍雷莊兒都成為咗惡搞對象，已經有網民將佢得獎環節上嘅畫面重點放大，喺佢棚牙，仲抵死到當雷莊兒合埋口時棚牙會收番埋，當笑容一展現時，棚牙又被放大。