呢個禮拜三，孫柏文講過，可以推翻今次升浪嘅一個隱憂，即佳士拿排頭攞錢嘅債主被害，攞錢喺其他人之後。令有資本嘅人唔敢放錢，因恐債仔出事破產會俾人搵笨。
應承大家今日講銀行壓力測試，因為呢個就係今次升浪第二大隱憂。首先提提大家，我落筆呢刻係未知測試結果，不過到大家睇到文時，結果已公佈。
測試如考ALevels，畀你pass晒五條E咁又點？攞乜嘢英文字母係唔緊要，最緊要係到九月有冇大學收。銀行壓力測試一樣，最終係要唔要增加資本。如果要，點增加。

金銀齊升有啟示

錢，一係私人資金，即輸咗會肉痛嗰隻，一係就政府出。家要私人投資者出錢買啲資不抵債、即零價值嘅嘢就真係難啲，所以應該又係花旗政府出錢。
咁政府已出咗唔少錢，買咗好多優先股，將優先股變成普通股去增資，就係唱到街頭巷尾都係咁諗嘅方案。例如美銀，傳聞被迫集資340億美元。咁佢哋已攞咗政府450億美元TARP，不過係優先股，照理只要變普通股，即時冇集資壓力，連手頭嘅建行都唔使賣。
不過點都好，啲銀行全部都係黑洞。填窿嘅政府錢應該又係聯儲局印，印完買國債。
雖然對上一次會議，聯儲局話唔會再印新銀紙，不過呢幾日壓力測試消息流出後，金、銀都係咁升。
唔再加碼印？得咩？不過印唔印，長息已靜靜地升，記得今年要嚴守SellinMay。
（三之二）
孫柏文
http://phatdat.blogspot.com