最近本地吹起一股懷舊風，八十年代的型人打扮更為人津津樂道。有見及此，商台將會於本月21日在廸士尼舉行「903廸士尼突襲」大派對，出席的歌手及DJ一律要以八十年代打扮示人。日前DJ卓韻芝和余廸偉便穿上該年代的服飾到香港廸士尼遊玩，回憶當年的生活點滴。

把八十年代的自己形容為「懵盛盛」的卓韻芝，最難忘當年誇張的化妝及髮型，她說：「當年好興一啲好深嘅化妝，尤其係眼影，同埋啲衫一定加好大嘅墊膊。即係好似《少林足球》入面趙薇嘅造型，所以到時派對上，我都會照住呢個打扮，務求做到嚇親人嗰啲樣。」
至於余廸偉就表示會以高腰喇叭褲、貼身恤衫的partylook出場，他說：「以前我都會落Noon-D（編者按：NoonDisco，八十年代本地的士高設下午場，不賣酒精飲料，主攻18歲以下青少年市場。）所以一定會以呢個造型出現。我真係特登搵番對厚底鞋、高腰喇叭褲，全部都係嗰個時候嘅衫嚟㗎！搵齊一套都唔易。不過以前試過喺外國時，返學第一日着住一對黃色嘅legwarmers，俾人勁笑，其實我都唔知佢哋笑乜。」
採訪：王連連
攝影：陳偉權