【豪華船P】馮盈盈傳與江嘉敏姊妹情不再 笑住點頭：哦，冇啲咁嘅事
蘋果日報 2020/06/11 16:54
反目馮盈盈江嘉敏姊妹情不再豪華船P
（IG圖片/無綫電視截圖）
馮盈盈和江嘉敏最近傳姊妹反目，盈盈早前被影到與已故賭王何鴻燊四房兒子何猷亨一齊上億元豪華遊艇開P，被指釣金龜。盈盈否認戀情，更疑擺好姊妹上枱，聲稱是江嘉敏邀請她上船，並介紹認識何猷亨。江嘉敏隨即否認自己做「媒人」，更爆馮盈盈之前跟何猷亨食過飯，二人各執一詞。江嘉敏前晚在社交網發文斥有人講大話，並說：「知人口面不知心。」矛頭直指馮盈盈。
馮盈盈早前上《Do姐有問題》做嘉賓，6月生日的盈盈獲節目組及劉佩玥送蛋糕慶祝，二人有相約食飯，但提起江嘉敏，馮盈盈即遊花園避談。訪問一開始，馮盈盈便被問是否姊妹情不再，一副港姐正經腔說：「其實因為我自己最近都比較少用社交平台，已經超過半個月無更新，其實對最近發生嘅事唔係好清楚，都係之後了解番。至於你話提到嘉敏一個post，裏面都冇明文話針對邊一個，我諗都唔需要胡亂猜測。我覺得就算係朋友，都應該保留番一啲個人空間，同私隱俾對方，唔需要事事過問。」
主持人問是否減少用社交網站，來減少是非？馮盈盈續說：「我覺得反而係踏入26歲，或者有啲位都可以俾番自己多啲個人空間，或者俾自己靜靜地沉澱下，減少用社交平台都係個好方式。」主持繼續咬住唔放追問是否姊妹情不再？盈盈笑住點頭：「哦，冇啲咁嘅事。」會否一齊慶祝生日？馮盈盈繼續遊花園：「其實有好多朋友約我慶祝生日，好多謝佢哋，但各有工作啦，所以要多啲時間先安排到。」另有指與猷亨早已認識，盈盈亦不敢再多言：「我諗牽涉太多朋友，我就唔係太方便答，我都唔想講太多。」
馮盈盈獲好姊妹劉佩再約食飯慶祝生日，但卻未提江嘉敏。（無綫電視截圖）
馮盈盈與江嘉敏各執一詞，盈盈表明不想對號入座。（無綫電視截圖）
馮盈盈早前失戀，江嘉敏亦有陪住對方。（IG圖片）
馮盈盈因為出席豪華船P，被指想釣金龜。（IG圖片）
江嘉敏在社交網發文斥有人講大話，並說：「知人口面不知心。」矛頭直指馮盈盈。（IG截圖）