苗禮德冷熱照食，奉行「最緊要贏馬」主義！呢晚一開場佢同田泰安夾手夾腳，幫「香港至尊」爆出半冷開齋，本月累積贏到第七W，成績相當唔錯。田泰安季初幫苗廐贏過好幾匹馬，之後騎練合作靜咗一輪，上個月開始又旺番，計埋「香港至尊」在內，已經合作贏咗五場頭馬。「香港至尊」苦戰三季一直贏唔到，今鋪初落五班跑番唯一上過名之泥地短途，即刻搞掂打開勝利之門，幫埋苗廐取得今季泥地首捷，都算一石二鳥！
練馬師苗禮德賽後透露，「香港至尊」馬主黃英豪由他99年來港開倉至今，一直支持無間，如今為他贏出頭馬，自己也感到安慰。雖然「香港至尊」經常出閘緩慢，所以排12檔不用早段被躋碰，反而對其更有利，加上牠上周曾作針對性操練，終於出閘順利後，全程走勢暢順，入直路再發力便越過對手贏馬。苗禮德又謂「香港至尊」今場「開竅」，可能還有多少進步，仍可以趁機在四班泥地短途再贏一場。