政府為咗硬推創新及科技局上馬，不斷要求財委會接二連三加會，希望趕喺情人節死線前完成審議，最新要求立法會喺情人節當日，會議由四個鐘加開至八個鐘，成為噚日財委會嘅討論焦點。民主黨主席劉慧卿發言時話，情人節會議密密開，連飯都冇時間食，真係冇人情。

葛博士關心卿姐感情

民建聯葛珮帆相當關心卿姐嘅感情生活，開會時當眾問卿姐係咪蜜運中，仲三姑六婆上身話：「快啲講畀我哋聽，等我哋同你慶祝吓！」卿姐冇佢咁好氣，公民黨梁家傑會後忍唔住問八方，就算卿姐蜜運，何解要同葛博士慶祝呢？早前民建聯蔣麗芸喺佢嘅網上節目訪問卿姐，追問卿姐嘅感情生活，卿姐都係拋下一句「隨緣啦」。
最鍾意日以繼夜、夜以繼日開會嘅工聯會亡國興，就好想同財委會主席張宇人共度佳節，話雖然人人都想情人節與深愛嘅人度過親密一日，但佢都願意通宵開會，通過撥款，「捨命陪君子，我願意情人節嗰日同你一齊作戰」。張宇人話，希望亡國興「唔係想攞我條命」，話原本喺情人節同太太有約會，家吓太太好可能要喺電視睇住佢，單丁過節。