神劇《太陽的後裔》男女主角宋仲基、宋慧喬將於下月31號結婚，雙宋本月3號被捕獲到合體飛美國洛杉磯，之後兩人飛抵三藩市，同行仲有知名攝影師洪章賢，盛傳兩人到當地拍攝婚紗相。

雙宋除咗出發被影到合體外，全程美國行都相當低調，令粉絲相當好奇兩人嘅行蹤。噚晚就有大陸微博用戶「飯愛豆」表示，自己喺韓國旅行時去咗雙宋常去嘅炸雞店，老闆向該粉絲透露雙宋已於噚日(8號)凌晨返韓。

不過今日就有網民透過Instagram表示自己見到宋仲基，Oppa更大方同佢握手令佢大感意外，但相中只見Oppa同一位男友人一齊，未見喬妹身影，而該網民嘅打卡地點顯示喺洛杉磯，似乎兩人早前於三藩市影完婚照就返回洛杉磯。

對於有網民喺洛杉磯捕獲到宋仲基，「飯愛豆」微博用戶就留言澄清只得喬妹返咗韓國，宋仲基仍然喺美國。