好耐冇見潮界金牌經紀人大隻標,自從佢泊到碼頭後,經常要為老闆港日兩邊走,好不忙碌。不過佢公餘亦不忘進修,最近佢就學習香港波鞋界術語。佢話學識行內術語,去「花街」買鞋亦冇咁易被呃,同波鞋街啲隱形富豪級老闆交談時亦可更加親切。要學波鞋術語,首先要背熟啲鞋Size點講,因為Sales最容易喺Size出蠱惑,如果學識Size術語,有乜唔妥就可即場踢爆。波鞋街Size術語,凡1稱為丁、2稱為元、3稱為王、4稱為叉、5稱為仔、6稱為共、7稱為也、8稱為分、9稱為尤、10稱為平,半號碼稱為仔。尺碼唔叫Size,而稱為孖二、冇Size就叫「M孖二」。例如存貨冇9號半,Sales就會同自己人講「M尤仔」。如果Sales話呢個客「腌四」,即係呢個客好煩,「星四」就即係Sales個朋友。大隻標話波鞋術語太多,有排都學唔完。如果想去花園街做,要有心理準備。
主持人:大食Jack
八卦熱報:
[email protected]