榮辱當前，職業球員不惜負傷上陣，絕對係真漢子！喺周日NHL（美國冰球大聯盟）哥倫布藍外套主場對匹茲堡企鵝嘅東岸首圈，主隊球員華蘭斯基（Zach Werenski）喺第二節尚餘6分46秒嘗試阻擋對手施射期間，冰球改變方向下由保護眼罩下方直接撞落呢位19歲球員隻右眼，佢頓時倒地之餘，更慘係企鵝乘住人數優勢入波追平3:3！

難得首節為藍外套射入一球嘅華蘭斯基並冇放棄，治理傷勢後繼續上陣，可惜球隊打到加時輸4:5，7場4勝制下落後到0:3，晉級睇嚟凍過水。華蘭斯基賽後喺社交網站上載一張眼腫鼻腫嘅自拍照，輕輕留咗一句「冰球季後賽……」（Playoff hockey...），認真辛酸。

↓NHL球員「食波餅」眼腫鼻腫↓
http://bit.ly/2omyE7r