當年今日
關於我們

大胃王:
$138任食意大利菜即叫即煮

蘋果日報 2002/05/04 00:00


每次食自助餐總是一副嚴陣以待的姿態,為求食到最貴最靚,達致食回票價的目的,總會不擇手段,左攻右搶!難道食自助餐只有這種模式?世事無絕對,今日介紹這間美式意大利餐廳,就剛好相反,大家不但不用你爭我奪地搶食,還可儀態萬千地坐在座位上落單,數十款意大利菜即叫即煮,而且價錢都只是百多元,想食多少叫多少。餐廳近日還增添了二十多款新菜,現在就等自助餐擁躉Mandy和Monlique幫你精挑細選幾款必試之選。

記者:黃婉冰 攝影:楊錦文 
ImageGirls:Monlique&Mandy
頂級特嫩美國牛扒
其中一款奉送的主菜就是最頂級又最貴的Prime牛扒,牛扒會先用芹菜、洋葱、甘笋、香料檸檬汁醃足一日,再以適當的溫度焗至三、四成熟,到人客落單時,才用由火山石製成的烤爐燒,將燒烤時滴出來的肉汁做牛扒汁,食得更原汁原味。

試味報告:牛扒經過又焗又烤,肉汁依然豐富,肉質軟熟嫩滑,牛肉味濃,經過一日的醃製,牛扒已夠味,不蘸牛扒汁反而可以食到微微燒烤香。
餐廳總廚李師傅表示,餐廳所選用的牛扒全部經過美國國家農業部檢定,全是最頂級的Prime牛扒,這種牛用穀物餵飼,所以肉質最為嫩滑少筋,平時一客6至8安士約$150,所以這款菜大家必定要食,絕對值回票價。
皇朝骨
另一款主菜是較少西餐廳有的皇朝骨,皇朝骨即近臀部位置,將皇朝骨醃過夜,放入焗爐內焗,將纖維打散,令肉質變得鬆化,塗上用十多種材料自製的BBQ醬,烤得一身古銅色,消脂成功,賣相同中式宮廷骨相似。

試味報告:皇朝骨肥大肉厚,肥瘦均勻,入口鬆化,BBQ醬味道香濃帶少許甜味,食落的確十分惹味可口。
炭燒挪威三文魚
除了數十款意式美食任食外,每位另奉送主菜一款,有三款選擇。其中這款三文魚扒,原條運到由大廚自己剝皮拆骨,用烤爐炭燒過後,配以味道較重的日式鰻魚汁,用汁的甜味吊出魚的鮮味,是較少有的巧妙配搭。
Monlique推介:整件三文魚扒啖啖肉,燒得好香脆,肉汁豐富,魚肉鮮甜,配鰻魚汁都幾夾。
菠菜釀蘑菇
別以為蘑菇不值錢,這種產於荷蘭肥大肉厚的鮮蘑菇,靠一身雪白膚色,令身價大升。釀入炒過的菠菜、洋葱及煙肉,鋪上四種美國及意大利芝士,用薯茸墊底焗熟,最高紀錄賣出千多粒,可見味力非凡。
Mandy推介:自己本身好鍾意食菇,所以這款蘑菇實在是不二之選,蘑菇有好香芝士味,但也不失本身菇味,而且芝士不會好膩及過濃。
意式炒蟹
意大利餐豈止薄餅、意粉咁簡單,這裏還有意式炒蟹,將新鮮活劏肉蟹,用番茄汁炒,茄汁是大廚依足意大利傳統做法,以鮮番茄、茄膏、新鮮迷迭香和十多種香料自家炮製而成,用來炒蟹,可帶出蟹的鮮味。

試味報告:茄汁有意大利汁醬的酸香特色,茄汁洋溢着陣陣香草味,茄汁只蘸在蟹殼上,蟹肉依然保持鮮甜,蟹肉嫩滑,夠新鮮。
煙鴨胸薄餅
薄餅是一餐中的頭盤,所以傳統餅底會以薄脆為主。大廚同樣將批底搋得很薄,鋪上各式材料如洋葱、青椒、法國煙鴨胸肉同Mozzarella、巴馬臣、車打四種不同口感和味道的芝士,由於薄餅焗製需時,所以薄餅不設落單,每晚會分三個時段分別焗製四至五款不同的薄餅,焗起後,侍應就會捧着熱辣薄餅到每位客人面前,食就攞,鍾意食幾多都得。

試味報告:批底厚薄啱啱好,不會焗得太乾,鴨胸肉鹹得幾惹味,四種芝士做出有香濃味又有煙韌口感的雙重效果,就算有四種芝士,食完也不覺膩。
店名:LaFesta
電話:28389318
地址:銅鑼灣謝斐道440號地下(紐約戲院後面)
座位:180個
營業時間:星期一至六中午12時至午夜12時,星期日晚上6時至午夜12時。
收費:晚上6時至8時離座成人$108,小童$78;晚上8時至9時半入座成人$138,小童$108;星期日至四晚上9時半後入座成人$78,小童$48;星期五、六晚上9時半後入座成人$108,小童$78。另加$18可任飲果汁、汽水,加$48可任飲紅、白酒。$78時段不連主菜。
付款方法:現金及信用卡(Visa,Master,AE,Diners,JCB)
備註:顧客可上網申請VIP卡一張,憑卡惠顧可獲九折優惠,生日更可獲贈Tiramisu一件及數碼相一張。
網址: http://www.lafesta-hk.com