【銅鑼灣】七月左右就做人老竇嘅陳小春,早幾日喺內地嘅節目爆咗呢個消息。前日下晝4點幾小春一身hip hop打扮,揸住部Hummer越野車去咗銅鑼灣,當佢泊低架車喺新寧道街邊嘅時候,忽然謝霆鋒嘅助手表哥行咗出嚟,見佢口噏噏而小春笑晒口,唔使問梗緊係讚佢叻仔之餘又恭喜佢就快做老竇啦。之後兩個男人企喺車旁邊吹水,煲咗一陣煙,有個男仔行嚟同小春會合,跟手就過咗去白沙道一間Nike店睇衫。
入到間店兩人分頭行事,一個睇鞋一個睇衫,可能小春都係唔放心架車擺街驚抄牌,睇咗15分鐘左右佢同個朋友已經行返去開車離開,直駛入咗柴灣一幢工業大廈。