今日（16日）沙田八草兩泥賽事，草地用最狹窄之C加3欄，度地儀指數2.71，場地掛牌為好地。今日將不會進行壓地。

雖然跑道狹窄，不過睇番上季9月18日首次C加3欄賽，掛牌好至快地及度地儀指數2.7，後追馬絕不吃虧，總共有六駒後上建功，其中「勇冠王」、「綠勇士」及「巴基之星」都係從尾叠追上反先對手勝出，靠後勁食糊嘅馬千祈咪睇小。

今戰列陣馬中，第八場「秘密武器」係全場唯一贏過田草C加3欄之馬，窄場性能唔使懷疑。

另外，第十場「英明勇將」兩次角逐田草C加3欄1400米獲一亞一殿未失前四名，準繩馬有力打開勝門。

泥地方面，今日兩場都係1650米，掛牌好地及硬度計指數8.92。近八場同程1650米放頭馬獲五W兩P，加上今季兩場泥地賽之放頭馬「大收成」及「雲信凡高」亦躋身三甲，所以擅跑泥地之前領馬如第三場「開心美麗」及第五場「五星特工」可優先留意。